Вояга етган ва меҳнатга лаёқатли фарзандлар меҳнатга лаёқатсиз, ёрдамга муҳтож ота-онасини моддий таъминлаши ҳамда уларга ғамхўрлик қилиши шарт. Ота-она давлат ёки нодавлат муассасасида яшаётгани фарзандларни бу мажбуриятдан озод этмайди.
Фарзандлар таъминотни ўзаро келишиб, ихтиёрий тарзда беришлари мумкин. Агар улар моддий ёрдам беришдан бўйин товласа, ота-она алимент ундириш учун судга мурожаат қилади. Суд тўлов миқдорини белгилашда фарзандларнинг моддий ва оилавий аҳволини баҳолайди. Даъво битта фарзандга нисбатан берилган бўлса ҳам, суд вояга етган, меҳнатга лаёқатли фарзандларнинг барчасини ҳисобга олади.
Иш кўрилаётган пайтда ота-она таъминотсиз қолмаслиги учун судья низо якунига қадар вақтинча тўланадиган суммани белгилаши мумкин. Фарзандлардан ундириладиган алимент қонунчиликда белгиланган меҳнатга ҳақ тўлаш энг кам миқдорининг 11,75 фоизидан кам бўлмаслиги керак.
Ота-онанинг касаллиги ёки бошқа узрли сабаблар туфайли қўшимча харажатлар келиб чиқса, вояга етган, меҳнатга лаёқатли фарзандлар уларда ҳам иштирок этади. Агар суд ота-она ўз вақтида ота-оналик мажбуриятларини бажаришдан бўйин товлаганини аниқласа, фарзандни ота-онага таъминот бериш мажбуриятидан озод қилиши мумкин. lex.uz
Ҳуқуқий асос — ўзбекча: Ўзбекистон Республикаси Оила кодекси, 109–113-моддалар.