«Temir daftar» og‘ir ijtimoiy ahvolga tushib qolgan oilalarni hisobga olish va ularning muammolarini hal qilish uchun yuritiladi. Uni Ijtimoiy himoya milliy agentligi va hududiy bo‘linmalari «Yagona milliy ijtimoiy himoya» axborot tizimi orqali yuritadi.
Qaysi oilalar kiritilishi mumkin?
Amaldagi tartibda oilaning holati bir nechta belgi birgalikda mavjudligi asosida baholanadi. Masalan, oilada mehnatga layoqatli shaxs yo‘qligi yoki yagona boquvchi parvarish bilan bandligi, og‘ir kasal yoki nogironligi bo‘lgan a’zolar borligi, moddiy ahvol og‘irligi, uy-joy yo‘qligi yoki uning holati yomonligi inobatga olinadi.
Shuningdek, boquvchisini yo‘qotgan oilalar, uch va undan ortiq voyaga etmagan farzandni yolg‘iz tarbiyalayotgan ota-ona yoki vasiy oilalari va ikki yoki undan ortiq a’zosi og‘ir kasal yoxud I–II guruh nogironligi bo‘lgan oilalar uchun belgilangan alohida belgilar yig‘indisi qo‘llanadi. Faqat bitta belgi mavjudligi o‘z-o‘zidan daftarga kiritish uchun etarli deb hisoblanmaydi.
Qaerga murojaat qilinadi?
Oilaning voyaga etgan a’zosi «Inson» ijtimoiy xizmatlar markaziga borib yoki «Yagona milliy ijtimoiy himoya» axborot tizimi orqali murojaat qilishi mumkin. Ijtimoiy xodim xonadonlarni o‘rganish jarayonida ham bunday oilani aniqlashi mumkin.
Ijtimoiy xodim oila ahvolini ikki ish kunida o‘rganadi. Mezonlarga mos kelsa, tavsiyanoma shakllantiriladi. «Mahalla ettiligi» uni uch ish kunida ko‘rib, kiritish yoki rad etish haqida qaror qabul qiladi; qaror murojaat qilgan oilaga bir ish kunida etkaziladi.
Muhim: «Temir daftar»ga kiritilgan oilaga yordam aniqlangan ehtiyoj va tegishli yordam turining qoidalariga muvofiq ko‘rsatiladi. Daftarga kirish barcha to‘lovlarni avtomatik tayinlamaydi.
Huquqiy asos: Vazirlar Mahkamasining 2024-yil 31-maydagi 313-son qarori.