Уч ёшга тўлмаган боласи бор бюджет ташкилоти ходимларидан бири учун ҳафталик иш вақти қисқартирилади. Ҳомиладор аёлларни ва ёш боласи бор ходимларни тунги ишга ёки хизмат сафарига жалб қилишда эса қўшимча шартларга риоя этилади.
Бюджетдан молиялаштириладиган ташкилотда ишлайдиган, 3 ёшга тўлмаган боланинг ота-онасидан бирига ёки васийсига ҳафтасига 35 соатдан ошмайдиган иш вақти белгиланади. Қисқартирилган иш вақтида ушбу ходимнинг меҳнатига тўлиқ кунлик иш учун белгиланган миқдорда ҳақ тўланади. Демак, қонунчиликда назарда тутилган мазкур қисқартиришнинг ўзи иш ҳақини камайтиришга асос бўлмайди.
Бюджетдан молиялаштирилмайдиган иш берувчиларда 3 ёшга тўлмаган боланинг ота-онасидан бири ёки васийсига қисқартирилган иш вақти жамоа келишуви, жамоа шартномаси ёхуд белгиланган тартибда қабул қилинган ички ҳужжат орқали жорий этилиши мумкин. Шунинг учун ходим ўз ташкилотида амал қилувчи ҳужжатларни ҳам текшириши лозим.
Ҳомиладор аёлни, шунингдек 14 ёшга тўлмаган боланинг ёки 16 ёшга тўлмаган ногиронлиги бўлган боланинг ота-онасидан бирини тунги ишга, иш вақтидан ташқари ишга, дам олиш ёки ишланмайдиган байрам кунидаги ишга жалб қилиш ва хизмат сафарига юбориш фақат унинг ёзма розилиги билан мумкин. Иш берувчи ходимга бундай ишдан ёки хизмат сафаридан воз кечиш ҳуқуқини тушунтириши шарт.
Ҳомиладор аёлни ёки 3 ёшга тўлмаган боласи бор аёлни тунги ишга жалб қилишда ёзма розиликнинг ўзи етарли эмас. Бундай иш аёл ёки боланинг ҳаёти ва соғлиғига хавф туғдирмаслигини тасдиқловчи тиббий хулоса ҳам бўлиши керак.
Ҳуқуқий асос: Ўзбекистон Республикаси Меҳнат кодекси, 396–397-моддалар.