Rejali statsionar davolanish zarur bo‘lsa, bemor avvalo o‘zi biriktirilgan birlamchi tibbiy-sanitariya muassasasiga murojaat qiladi. Oilaviy shifokor uni ko‘rikdan o‘tkazadi va kerak bo‘lsa tor soha mutaxassisiga yo‘naltiradi. Mutaxassis statsionarda davolanishga tibbiy ko‘rsatma bor-yo‘qligini aniqlaydi.
Davlat mablag‘lari hisobidan rejali davolanish uchun elektron yo‘llanma rasmiylashtiriladi. U QR-kodga ega bo‘ladi. Zarur hollarda tibbiy-tanlov komissiyasi bemorning hujjatlarini ko‘rib chiqadi va davolanish darajasini tasdiqlaydi. Bemor tasdiqlangan yo‘llanma bo‘yicha, belgilangan daraja va Davlat tibbiy sug‘urtasi jamg‘armasi bilan shartnoma shartlariga muvofiq, tibbiyot tashkilotini tanlaydi.
Yo‘llanmaning rasmiylashtirilishini biriktirilgan tibbiyot muassasasi orqali kuzatish mumkin. Nizomda YaIDXPdagi shaxsiy kabinet yoki mobil ilova orqali kuzatish imkoniyati ham nazarda tutilgan.
Muhim: rejali statsionar yordam uchun tegishli yo‘llanmasiz tibbiyot tashkilotiga bevosita murojaat qilinsa, xizmat pulli bo‘lishi mumkin. Shoshilinch va kechiktirib bo‘lmaydigan yordam bundan mustasno.
Shoshilinch holatda bemor yo‘llanma olish jarayonini kutmasligi kerak: 103 chaqiriladi yoki zudlik bilan tibbiyot muassasasiga murojaat qilinadi. Rejali davolanish uchun tuzilgan yo‘llanma va navbat tartibi shoshilinch yordam ko‘rsatishni kechiktirishga asos bo‘lmaydi.
Huquqiy asos: Vazirlar Mahkamasining 2025-yil 4-noyabrdagi 694-son qarori.